水族縱橫AquaJourney: 魚糧小分析

《魚糧小分析》

市面上咁多種魚糧到底揀邊種好？

相信依個問題不論新手老手都有問過

希望係到用我個人經驗係玩家角度做個小分析幫大家揀一隻適合嘅魚糧

ps:唔好期待我用營養學角度分析，因為我都唔識

我只會用搶口程度同魚隻食後表現作分析

生口類:

生活口類絕對係令人又愛又恨嘅糧

雖然佢地比較接近魚類原生食物亦都較搶口

但係一旦處理不當，或者買到品質唔好嘅產品

就會得不償失，令魚類產生疾病。

紅蟲

最廣泛應用的生口糧之一，不論魚隻大小都適合食用，蛋白質豐富，谷魚佳品。唯在餵食是必須留意紅蟲的尺寸是否適合魚隻口徑，以避免出現吞食困難。同時最好避免每日餵食(七彩埃仔等魚種除外)以免因過量餵食導致腹水。雖然市面上產品眾多，但亦必須選購較有保證的產品，以避免因食物來源不潔而引起疾病。如：腹水，內寄生蟲等。個人推薦海鷗牌紅蟲，一方面粗幼度適中，適合各種魚隻；一方面冰塊較少血水，可直接餵食。

豐年蝦幼體(bbs)

相信飼養小型魚或者有繁殖過嘅魚友都非常熟悉，由於會不停游動，可以引起魚隻食慾，非常適合初生魚苗或新買嘅野生魚食用。一般燈魚或者短鯛等等都可以作為其中一樣主食，但對於較大型魚隻例如七彩神仙，埃及線等等就未必適合。同時由於營養豐富，亦都有助魚隻發色。除左可以係天河同神話買到新鮮bbs，唔怕麻煩亦可以買蛋自己敷；買麻煩就可以買新鮮嘅bbs再造成冰塊方便長期餵食。

注意：因為豐年蝦係用鹹水敷化同飼養，喂食時最好先用淡水沖洗避免鹽份進缸

水蚤

同豐年蝦幼體一樣，都係非常能夠引起魚隻食慾嘅生口糧。而且由於用淡水飼養，引起疾病嘅機率大大減少，但同時營養較低，比較適合當作零食使用。但唯一好處係魚友可以在家自己以綠水培育，生生不息，對做開繁殖嘅玩家係唔錯嘅選擇。

蟋蟀

由於不少魚喺大自然都係以昆蟲為食糧，蟋蟀成為人工環境中最受歡迎嘅活體食物。小編建議買蟀毛餵食，一方面因為未成熟，唔識叫；另一方面是體型較細，適合各種魚類進食。間唔中餵會增加魚隻野性，有助發色。

乾糧

以科學集合各種營養製成魚糧，減低因進食不潔食物引起疾病的機率。但未必完全適合每種魚類，需要根據魚種的食性購買不同的魚糧。

Tetra bits

以增加魚隻顏色聞名嘅乾糧，顆粒大小適中，乾糧中算搶口，適合各種魚種食用。但或者對某啲魚種黎講會太硬，建議可以整碎後先用。同時由於增色能力太強，如果餵得太密或會出現假色問題。所以建議同其他糧混合使用。

Tropical soft line(sinking sticks)

由大廠Tropical最新研發嘅彷紅蟲魚糧，並針對不同魚種設有不同大小及營養組合。餵飼燈魚或短鯛就建議用size s。成份方面佢用左昆蟲幼蟲同鯡魚提供豐富蛋白質，同時加入磷蝦，水蚤等提供類胡蘿蔔素幫助魚類發色，而口感方面呢隻糧口感柔軟，下沉快，令上中下層魚種都可以食到。同時由於與紅蟲相似，唔少魚種都可以迅速適應。係小編最喜愛嘅乾糧之一。